Tre doza të vaksinës janë të domosdoshme për mbrojtjen kundër variantit Omicron

Shkencëtarët në Mbretërinë e Bashkuar kanë paralajmëruar se dy doza të vaksinës Covid nuk janë të mjaftueshme për t’u mbrojtur nga infektimi me variantin Omicron.

Analiza e hershme e rasteve të Omicron dhe Delta në Mbretërinë e Bashkuar tregoi se vaksinat ishin më pak efektive në ndalimin e variantit të ri. Por një dozë e tretë përforcuese parandalon simptomat e Covid te rreth 75% e njerëzve.

Ndërkohë, Sekretari i Ҫështjeve Sociale, Michael Gove, i cili kryesoi një takim me ministrat e parë të vendeve të deleguara dje pasdite, paralajmëroi se Mbretëria e Bashkuar po përballet me një “situatë thellësisht shqetësuese”. Duke folur pas mbledhjes së komitetit qeveritar të emergjencës Cobra, ai tha se masat e ndërmarra deri më tani ishin “proporcionale”, por ministrat po mbanin “absolutisht” gjithçka nën shqyrtim.

“Veprimet konkrete janë absolutisht të nevojshme dhe me marrjen e të dhënave të reja, ne do të shqyrtojmë se çfarë veprimi duhet të ndërmarrim në varësi të atyre të dhënave”, shtoi ai. Kjo vjen pasi 448 raste të tjera të Omicron u konfirmuan në MB, duke e çuar numrin e raportuar deri më tani në 1,265. Numri i përgjithshëm i rasteve me Covid të regjistruar deri ditën e premte ishte 58,194 – shifra më e lartë që nga 9 janari.

Qeveria ka thënë se po përditëson udhëzimet e saj për shtëpitë e kujdesit në Angli – duke kufizuar numrin e vizitorëve të lejuar për person rezident dhe duke rritur testimet “në mënyrë që të balancohet rreziku aktual i Covid-19”. Një nga shqetësimet kryesore që kur u shfaq për herë të parë varianti Omicron me numrin e lartë të mutacioneve, ishte se ai do t’i bënte vaksinat më pak efektive.

Raporti i Agjencisë së Sigurisë Shëndetësore në Mbretërinë e Bashkuar analizoi të dhënat nga 581 raste me Omicron dhe mijëra raste me Delta për të llogaritur se sa efektive ishin vaksinat kundër variantit të ri. Analiza bazohet në një numër të kufizuar të dhënash, por tregoi një rënie dramatike të efektivitetit për vaksinën Oxford-AstraZeneca dhe një rënie të konsiderueshme të mbrojtjes nga dy dozat e Pfizer.

Mbrojtja 75% ndaj simptomave të Covid pas një doze përforcuese nuk është aq e lartë sa ndaj varianteve të mëparshme. Nuk kishte të dhëna të mjaftueshme për të analizuar vaksinat Moderna ose Janssen, por nuk ka asnjë arsye për të menduar se rezultatet do të ishin të ndryshme për to.

Sidoqoftë, Agjencia e Sigurisë Shëndetësore në Mbretërinë e Bashkuar tha se vaksinat kishin ende gjasa të ofronin mbrojtje të mirë kundër rasteve të rënda me Covid që kishin nevojë për trajtim spitalor. Deri më tani, rreth 22 milionë njerëz kanë marrë një dozë përforcuese, por edhe nëse të gjithë do ta kishin bërë atë, efektiviteti më i ulët i vaksinës do të bënte përsëri që miliona njerëz të mbeteshin vulnerabël.

Të dhënat reale nga bota mbështesin studimet laboratorike që treguan një reduktim me 40-fish të aftësisë së antitrupave për të luftuar virusin te njerëzit me dy doza vaksine.

Ekziston një optimizëm që vaksinat do të vazhdojnë të ruajnë shumë njerëz nga nevoja për t’u shtruar në spital, megjithëse më shumë persona do të infektohen me Covid. Megjithatë, një valë Omicron mund të jetë problematike edhe nëse do të ishte më e butë. Një valë e madhe dhe e papritur mund të bëjë që të gjithë ata që janë ende vulnerabël të kenë nevojë për kujdes spitalor në të njëjtën kohë.

Rritja e shpejtë e rasteve të Omicron tashmë nënkupton se varianti po depërton një pjesë të mbrojtjes të ofruar nga vaksinat. Vlerësohet se numri i rasteve të Omicron po dyfishohet çdo dy deri në tre ditë.

Agjencia e Sigurisë Shëndetësore në MB vlerëson se më shumë se gjysma e të gjitha rasteve në MB do të jenë Omicron deri nga mesi i dhjetorit dhe, nëse kjo rritje vazhdon në mënyrë të pandërprerë, do të ketë më shumë se 100,000 raste ditore deri në fund të muajit.

Dr. Mary Ramsay, kreu i sektorit të imunizimit në UKHSA, tha: “Këto vlerësime paraprake duhet të trajtohen me kujdes, por ato tregojnë se kur kanë kaluar disa muaj nga marrja e dozës së dytë, ekziston një rrezik më i madh për t’u infektuar me variantin Omicron në krahasim me atë Delta”.

“Ne presim që vaksinat të ofrojnë mbrojtje më të lartë kundër komplikimeve serioze të COVID-19, kështu që nëse nuk i keni marrë ende dy dozat tuaja të para, ju lutemi t’i bëni ato menjëherë.”

Ky studim vjen në një kohë kur janë shtuar shqetësimet për numrin në rritje të rasteve të Omicron në MB. Ministrja e Parë e Skocisë, Nicola Sturgeon, ka paralajmëruar për një “tsunami” të rasteve pasi ajo vendosi shtrëngimin e rregullave të izolimit për Covid dhe i bëri thirrje njerëzve të anulonin planet e festave të Krishtlindjeve.

Sipas udhëzimit të ri për shtëpitë e kujdesit në Angli, rezidentët do të lejohen të marrin vizita vetëm nga tre persona, plus një kujdestar. Departamenti i Shëndetësisë dhe Kujdesit Social tha se testimet do të rriten gjithashtu për rezidentët e vaksinuar plotësisht që bëjnë vizita jashtë qendrave, si dhe për stafin, ndërsa ekipet e vaksinimit po shtohen për të rritur aplikimin e dozave përforcuese./ BBC