2 viktima të tjera në Kosovë, shkon në 24 numri i vdekjeve nga koronavirusi

Dy persona kanë vdekur si pasojë e koronavirusit në veri të vendit në 24 orët e fundit, ndërsa janë regjistruar edhe dy raste të reja të infeksionit.

Kështu, numri në total i personave që kanë humbur jetën nga COVID-19 në Kosovë është 24.

Në një deklaratë për mediat, epidemiologu serb, Aleksandar Antonijeviç tha se katër persona të tjerë janë shëruar nga ky virus.

“Në repartin e kraharorit torakal të Mitrovicës ndërroi jetë një grua nga Leposaviqi (1948), e prekur nga COVID-19, por vdiq nga pasojat e infarktit të miokardit. Ajo u testua në mbrëmje dhe ishte pozitive për koronavirus”, tha Zlatan Elek nga spitali në veri të Mitrovicës.

Viktima e dytë është një grua tjetër nga Zubin Potoku (1947), e cila ndërroi jetë në Kragujevc dhe që po ashtu kishte sëmundje shoqëruese. Ndërkohë, në veri të Kosovës kanë vdekur 8 persona.