Një vaksinë anti – covid gati për Krishtlindje?

Gazetare: Klevisa GJIKA

“Në rastin më të mirë” vaksina kundër COVID-19 mund të jetë gati për Krishtlindje. Kështu u shpreh ministri i shëndetësisë në Britaninë e Madhe, Matt Hancock.

“Po punohet me intensitet për të por do të mund ta rekomandojmë vaksinën vetëm kur ta dimë që është klinikisht e sigurt”, shprehet ai në lidhje me përdorimin e vaksinës.

Hancock tha se duhet bërë kujdes sepse vaksinat janë një shkencë e pasigurt, megjithatë ai dha fjalën se në momentin e daljes së vaksinës ajo do të jetë e disponueshme për të gjithë qytetarët.

“Qasja jonë ndaj vaksinës është që ajo i përket qytetarëve të botës”, theksoi ministri.

Krahas kësaj, u diskutua edhe në lidhje me rikthimin e virusit keqbërës në dimër. Hancock tha se prioriteti i qeverisë është “kontrollimi i virusit dhe përgatitja për stinën e dimrit”. Rikthimi i virusit ka bërë që autoritetet të punojnë vazhdimisht për shtimin e furnizimeve, pajisjeve mbrojtëse dhe ilaçeve. Madje, ai nuk la pa përmendur edhe faktin e një karantinimi të dytë.

“Nuk e përjashtojmë mundësinë e karantinës nëse do të jetë nevoja”, theksoi ai. / TheGuardian